Bobošojce

Z Wikipedije, swobodneje encyklopedije
Zur Navigation springen Zur Suche springen
Bobošojce
Bahnsdorf
gmejna: Nowa Jazorina
zagmejnowanje: 2002
wysokosć: 111 metrow n.m.hł.
51.58111111111114.113055555556111
póstowe čisło: 03103
předwólba: 035751
Wojerski pomnik w Bobošojcach

Wojerski pomnik w Bobošojcach

Wobdźěłać
p  d  w
Information icon.svg

Bobošojce (němsce Bahnsdorf) su wjes w braniborskej Delnjej Łužicy, kotraž je wot 1. februara 2002 dźěl gmejny Nowa Jazorina. Nadeńdźe so we Łužiskej jězorinje něhdźe jednaće kilometrow sewjerowuchodnje Złeho Komorowa a słuša do serbskeho sydlenskeho ruma.

Geografija

Do gmejnskeho dźěla słušeja wjes Lěska a wjesne dźěle Cłonice (Zollhaus), Lambownja (Dörrwolf), Lipa (Lindenfeld) a Žarnowska budka (Sornoer Buden). Dohromady maja něhdźe 700 wobydlerjow.

Susodne wjeski su Lindow na sewjeru, Lěska na juhowuchodźe a do Ranja słušacy Wołobuz na zapadźe. Wuchodnje Bobošojc nadeńdźe so Wjelcejske lětanišćo a na juhu Sedličanski jězor. Njedaloko wsy běža zwjazkowej dróze B 96 (Budyšin–Rań), B 156 (přez Grodk a Běłu Wodu do Budyšina) kaž tež B 169 (Zły Komorow–Choćebuz). Nimo toho maja Bobošojce zastanišćo při železniskej čarje do Choćebuza.

Stawizny

Prěni raz naspomni so wjeska w lěće 1462 jako Baynstorff. Mjeno bu najskerje wotwodźene wot serbskeho słowa bahno.

Po statistice Arnošta Muki mějachu Bobošojce srjedź 1880tych lět cyłkownje 424 wobydlerjow, z kotrychž běchu 154 Serbow (36 %) a 270 Němcow.[1] W statistice Arnošta Černika z lěta 1956 so wjes hižo njejewi, dokelž tam mjeztym nichtó wjace serbsce njerěčeše.

W lěće 1965 wottorhachu dźěl wjeski za Sedličansku brunicowu jamu, při čimž dyrbješe so 20 wobydlerjow přesydlić. 1974 zagmejnowaštej so susodnej wjesce Wołobuz a Lěska.

Hač do lěta 2002 běchu Bobošojce samostatna gmejna a zjednoćichu so potom z Lindowom, Lubochowom a Rašynom do noweje gmejny „Nowa Jazorina“.

Nóžki

  1. Ernst Tschernik: Die Entwicklung der sorbischen Bevölkerung. Akademie-Verlag, Berlin 1954. → wšě wjeski
Z Wikipedije, swobodneje encyklopedije