Bobolcy

Z Wikipedije, swobodneje encyklopedije
Zur Navigation springen Zur Suche springen
Bobolcy
Boblitz
město: Budyšin
zagmejnowanje: 1934 (do Hornjeje Kiny)
wobydlerstwo: (31. decembra 2017)[1]
wysokosć: 227 metrow n.m.hł.
51.14568514.420465227
póstowe čisło: 02625
předwólba: 03591
Wobdźěłać
p  d  w
Information icon.svg

Bobolcy (němsce Boblitz) su wjeska w Hornjej Łužicy a słušeja k Budyskemu měšćanskemu dźělej Hornja Kina.

Geografija

Wjeska nadeńdźe so na samym juhu měšćanskeho teritorija, něhdźe połdra kilometra juhozapadnje Hornjeje Kiny při hornim běhu Bobolčanskeje wody, žórlicy Albrechtowki. Susodne wsy su nimo Hornjeje Kiny tež Bělšecy a Dźenikecy na juhowuchodźe, Debsecy na juhu a Dźěžnikecy na juhozapadźe.

Njedaloko wsy na zapadźe běži železniska čara Budyšin–Žandawa, na kotrejž pak žadyn železniski wobchad wjace njewobsteji.

Stawizny

Prěnje historiske naspomnjenje Bobolc jako sydło ryćerja Hermannus de Bobelicz pochadźa z lěta 1290.[2] Wjesne mjeno je wotwodźene wot muskeho předmjena Bobol, přirunaj bob („buna“).[3] Ležownostne knjejstwo we wsy wukonješe w lěće 1777 Budyska měšćanska rada. Do Bobolc słušeštej tež sydlišći Małe Bobolcy (dźensa dźěl Mnišonca) a Nowe Bobolcy (tež Schleppheim) při šoseji z Budyšina do Dźěžnikec, dźensa ke gmejnje Hornja Hórka.

Hač do 30. junija 1934 běchu Bobolcy samostatna wjesna gmejna, potom buchu zagmejnowane do Hornjeje Kiny.

Wobydlerstwo

Po Mukowej statistice z lětow 1884/85 rěčachu tehdy 83 wot cyłkownje 88 Bobolčanow serbsce (94 %).[4] Arnošt Černik zwěsći w lěće 1956 za cyłu Hornjokinjansku gmejnu jenož hišće snadny serbskorěčny podźěl wobydlerstwa wot 4,7 %.[5]

Ewangelscy Bobolčenjo přisłušeja ze starodawna Budyskej wosadźe swj. Michała.

Pomniki

Jako kulturne pomniki su připóznate dwustronski statok z domskim a bróžnju (Bobolčanska čo. 15), třistronski statok z domskim, bróžnju, hródźu a remizu (čo. 17) a dalše domske z přitwarjenej hródźu ze 16. lětstotka (čo. 19).

Hlej tež: Lisćina kulturnych pomnikow w Hornjej Kinje

Wosobiny

  • Pětr Bjedrich Halka (1761–1833) – farar a domiznowědnik; narodźeny w Bobolcach
  • Jan Awgust Pětř (1868–1947) – wulkobur, wjednik saksoswěrnych Serbow; narodźeny w Bobolcach

Žórła

  1. staw: 31. decembra 2017; Statistiska rozprawa města Budyšina za IV. kwartal 2017, měrc 2018
  2. Bobolcy w Digitalnym stawizniskim zapisu městnow Sakskeje (němsce)
  3. Walter Wenzel: Oberlausitzer Ortsnamenbuch. LND, Bautzen 2008, str. 38
  4. Ernst Tschernik: Die Entwicklung der sorbischen Bevölkerung. Akademie-Verlag, Berlin 1954. → wšě wjeski
  5. Ludwig Elle: Sprachenpolitik in der Lausitz. Ludowe nakładnistwo Domowina, Budyšin 1995, str. 245. [507 wobydlerjow, z nich 20 dorosćenych z aktiwnymi znajomosćemi serbšćiny, 3 z pasiwnymi, 1 serbske dźěćo abo młodostny, 483 bjez znajomosćow] → wšě wjeski
Z Wikipedije, swobodneje encyklopedije