Pawoł Krawc (1901)

Z Wikipedije, swobodneje encyklopedije
Zur Navigation springen Zur Suche springen

Pawoł Krawc (němsce Paul Schneider; * 18. měrca 1901 w Połpicy, † 26. septembra 1980 w Lemišowje) bě serbski twarski mišter, Domowinski funkcionar a twarski nawoda Serbskeho domu.

Narodźi so jako syn twarskeho mištra Jana Krawca a nawukny powołanje mulerja. W lěće 1931 namrě nanowy twarski wobchod a cementownju w Lemišowje, kotrejž nawjedowaše hač do přepodaća zawoda do ludoweho swójstwa w lěće 1952. Wot 1954 do 1967 dźěłaše jako twarski inženjer w Podstupimskim wobwodźe. W lěće 1967 poda so na wuměnk a nawróći so do Łužicy.

Krawc słušeše – hromadźe z Pawołom Jenku, Janom Křižanom a Pawołom Nedom – w mjezywójnskim času do prócowarjow w serbskim towarstwje „Zernička“ w Lichanju. W lěće 1928 organizowaše podpismowu akciju za podawanje serbskeje wučby w šulskim wobwodźe Hućina-Zubornička a wustupowaše na zarjadowanjach Domowiny přećiwo wutupjenju serbstwa w narańšich kónčinach. W februarje 1934 bu tohodla zajaty a běše wjacore měsacy w koncentraciskim lěwje Hohnstein. Po tym steješe pod dohladom gestapa.

Po druhej swětowej wójnje sta so z prěnim wjesnjanostu w Stróži a bu powołany do Budyskeje wokrjesneje komisije za rólnu reformu. W Domowinje skutkowaše jako wobwodnik Budyskeje župy a zarjadowa w lěće 1947 sobu prěni a tehdy najwjetši powójnski zjězd serbskeho zwjazka w Malešecach. Jako twarski inženjer nawjedowaše po 1947 natwar noweho Serbskeho domu při Póstowym naměsće w Budyšinje.

Pawoł Krawc bě nan serbskeho spisowaćela Křesćana Krawca (* 1938).

Spisy

  • Rozpominanje historiskeje zhromadźizny dowěrnikow Domowiny l. 1936. W: A tola Serbam lipa kćě, Budyšin 1962, str. 88–95.
  • Po boku doprědkarskich narodow kročimy do lěpšeho přichoda. W: Nowa doba, 12. oktobra 1947.

Žórle

  • Měrćin Völkel: Krawc, Pawoł [2]. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 294
  • Jan Cyž: Nekrolog. Nowa doba dnja 4. oktobra 1980.
Z Wikipedije, swobodneje encyklopedije